“ಕೊಪ್ಪಳ|ಸಾಹಿತ್ಯ–ಸಾಂಸ್ಕೃತಿಕ ಸಡಗರಕ್ಕೆ ಸಾಕ್ಷಿ : ಅಭೂತಪೂರ್ವ ಯಶಸ್ಸು ಕಂಡ 11ನೇ  ಚುಟುಕು ಸಮ್ಮೇಳನ”

• ಸೆಕ್ಯುಲರ್‌ ವಾಯ್ಸ್‌ ನ್ಯೂಸ್‌ ಕೊಪ್ಪಳ: 

 ಜಿಲ್ಲೆಯ ಸಾಹಿತ್ಯ ಚಟುವಟಿಕೆಗಳಿಗೆ ವೇದಿಕೆಯಾದ ಹನ್ನೊಂದನೇ ಜಿಲ್ಲಾ ಚುಟುಕು ಸಾಹಿತ್ಯ ಸಮ್ಮೇಳನ ನಗರದ  ಸಾಹಿತ್ಯ ಭವನದಲ್ಲಿ ಜರುಗಿದ್ದು, ವಿಷಯಗರ್ಭಿತ ಗೋಷ್ಠಿಗಳು, ಕವಿಗೋಷ್ಠಿ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳಿಂದ  ಗಮನ ಸೆಳೆದಿತು.

ಸಮ್ಮೇಳನ ಉದ್ಘಾಟಿಸಿ ಮಾತನಾಡಿದ ವಿಧಾನ ಪರಿಷತ್ ಸದಸ್ಯೆ ಹೇಮಲತಾ ನಾಯಕ, ಕೊಪ್ಪಳದಲ್ಲಿ ಚುಟುಕು ಸಾಹಿತ್ಯಕ್ಕೆ ದೀರ್ಘ ಪರಂಪರೆ ಇದ್ದು, ಪರಿಷತ್ತು ಅನೇಕ ಪ್ರತಿಭಾವಂತರನ್ನು ಹೊರತರುತ್ತಿದೆ ಎಂದು ಹೇಳಿದರು. ಗಜೇಂದ್ರಗಡದ ತಳ್ಳಿ ಹಾಳ ಕೋಡಿಮಠದ ಶರಣ ಬಸವೇಶ್ವರ ಸ್ವಾಮೀಜಿ ಆಶೀರ್ವಚನ ನೀಡಿ, ಜಿಲ್ಲೆಯಲ್ಲಿ ಸಾಹಿತ್ಯಾಸಕ್ತಿಯ ವಾತಾವರಣ ಶ್ಲಾಘನೀಯ ಎಂದರು.

ಸಮ್ಮೇಳನಾಧ್ಯಕ್ಷ ವೀರಣ್ಣ ವಾಲಿ ಅವರ ಸಮ್ಮೇಳನ ಆಶಯ ಪತ್ರವನ್ನು ವೇದಿಕೆಯಲ್ಲಿ ಬಿಡುಗಡೆ ಮಾಡಲಾಯಿತು. ಮೈಸೂರು ಜಿಲ್ಲೆಯ ಕವಯತ್ರಿ ಸೀತಾಲಕ್ಷ್ಮೀ ವರ್ಮಾ ಅವರ ‘ಬಣ್ಣ ಬಣ್ಣದ ಬಿಂದಿಗಳು’ ಕವನ ಸಂಕಲನವನ್ನು ಲೋಕಾರ್ಪಣೆ ಮಾಡಲಾಯಿತು.

ಮೊದಲ ಗೋಷ್ಠಿಯಲ್ಲಿ ಕುಕನೂರು ತಾಲೂಕು ಪಂಚಾಯಿತಿ ಅಧ್ಯಕ್ಷ ಬಸವರಾಜ ಉಪ್ಪಿನ ‘ಚುಟುಕು ಸಾಹಿತ್ಯ: ವೈಶಿಷ್ಟ್ಯ ಮತ್ತು ಅವಲೋಕನ’ ವಿಷಯವಾಗಿ ಮಾತನಾಡಿ, ಸರ್ವಜ್ಞನ ಕಾಲದಿಂದಲೂ ಚುಟುಕು ಸಾಹಿತ್ಯ ಬಲ ಪಡೆದುಕೊಂಡಿರುವುದನ್ನು ಉದಾಹರಿಸಿದರು.

ನಂತರ ನಡೆದ ಕವಿಗೋಷ್ಠಿಯಲ್ಲಿ ಕೊಪ್ಪಳ, ಗಂಗಾವತಿ, ಕಾರಟಗಿ, ಕುಕನೂರು, ಯಲಬುರ್ಗಾ, ಕುಷ್ಟಗಿ ಸೇರಿದಂತೆ ವಿವಿಧ ತಾಲೂಕುಗಳ 58 ಕವಿ–ಕವಯತ್ರಿಯರು ತಮ್ಮ ಚುಟುಕುಗಳನ್ನು ವಾಚಿಸಿದರು. ಕವಿಗೋಷ್ಠಿಗೆ ವೀರಬಸಪ್ಪ ಪಟ್ಟಣಶೆಟ್ಟಿ ಅಧ್ಯಕ್ಷತೆ ವಹಿಸಿದರು.

“ಕೊಪ್ಪಳ ಜಿಲ್ಲೆಯ ಅಭಿವೃದ್ದಿ ಸವಾಲುಗಳು” ವಿಷಯದ ವಿಚಾರಗೋಷ್ಠಿಯಲ್ಲಿ  ರಾಜ್ಯ ಕೃಷಿ ಬೆಲೆ ಆಯೋಗದ ಸದಸ್ಯ ಡಿ.ಎಚ್. ಪೂಜಾರ, ಕೊಪ್ಪಳ ವಿಶ್ವವಿದ್ಯಾಲಯದ ಕನ್ನಡ ಪ್ರಾಧ್ಯಾಪಕ ಡಾ. ಪ್ರವೀಣ ಪೋಲಿಸ್ ಪಾಟೀಲ, ಜಿಲ್ಲೆಯ ಆರ್ಥಿಕ–ಸಾಮಾಜಿಕ ಪ್ರಶ್ನೆಗಳ ಕುರಿತು ಅಂಕಿಅಂಶಗಳೊಂದಿಗೆ ಚರ್ಚಿಸಿದರು. ಗೋಷ್ಠಿಗೆ ಹಿರಿಯ ಅರ್ಥಶಾಸ್ತ್ರಜ್ಞ ಶರಣಬಸಪ್ಪ ಬಿಳಿಯಲಿ ಅಧ್ಯಕ್ಷತೆ ವಹಿಸಿದರು. ಸಮಾರೋಪ ಸಮಾರಂಭದಲ್ಲಿ ತಲೇಖಾನ್ ಮಠದ ವೀರಭದ್ರ ಶರಣರು ದಿವ್ಯ ಸಾನಿಧ್ಯ ವಹಿಸಿದರು.

ಕೊಪ್ಪಳ ವಿಶ್ವವಿದ್ಯಾಲಯದ ಆಡಳಿತಾಧಿಕಾರಿ ಪ್ರೊ. ತಿಮ್ಮಾರೆಡ್ಡಿ ಮೇಟಿ, ಜನಪದ ತಜ್ಞ ಸಿ.ವಿ. ಜಡಿಯವರ್, ರಾಜಕೀಯ ವಿಶ್ಲೇಷಕ ಶಿವಣ್ಣ ರಾಯರಡ್ಡಿ ಸಾಹಿತ್ಯ ಸಮಾಜ ಪರಿವರ್ತನೆಗೆ ಶಕ್ತಿ ಎಂದು ಅಭಿಪ್ರಾಯಪಟ್ಟರು. ಯುವಜನತೆಗೆ ಸಾಹಿತ್ಯಾಸಕ್ತಿ ಬೆಳೆಸಬೇಕೆಂದು ಗಿರಿಜಾಶಂಕರ ಪಾಟೀಲ ಕರೆ ನೀಡಿದರು. ಸಮ್ಮೇಳನದ ಅಧ್ಯಕ್ಷ ರುದ್ರಪ್ಪ ಭಂಡಾರಿ ಕಾರ್ಯಕ್ರಮ ಯಶಸ್ವಿಗಾಗಿ ಸಹಕರಿಸಿದವರಿಗೆ ಧನ್ಯವಾದ ಹೇಳಿದರು. ದಿನಪೂರ್ತಿ ನಡೆದ ನೃತ್ಯ–ಸಂಗೀತ–ಸಾಂಸ್ಕೃತಿಕ ಪ್ರದರ್ಶನಗಳಿಂದ ಸಮ್ಮೇಳನ ಭಾವಗರ್ಭಿತವಾಗಿ ಸಂಪನ್ನವಾಯಿತು.